تقدروا تقولوا ان البوست دا نوع من الرد الجماعي على كل من علق على موضوع الحمار اللي كان قبل دا ( اللي عايز يقراه يدور هو براحته بقى ) لان كثير اكد وانا معهم ان الشرف لا يكمن في فكرة غشاء البكارة كلامكم مظبوط النهاردة ومن حالة الفضا اللي انا فيها بقيت افتح اي رسالة تجيني من اي موقع اي كان ... ليا انا بروفايل على موقع اسمه Tagged المهم وصلت رسالة ان في حته طرية دخلت البروفايل بتاعي ... واتهورت ... واتطورت وداست نبقى اصحاب ... يا سنة سوخه اخيرا في حريم عبرت شكلي العكر وقالت نبقى اصحاب ... طب ادخل اشوف من ذات العيون الحولاء دي
خير اللهم اجعله خير لاقيت واحده كما قال الكتاب في وصف أشكال الجمال حاجه كده مبتتكررش غير كل 40 مليون ست ... لا وكانت سيبالي تعليق بتقول you are so cute
انا حسيت انها كتبت غلط ... لا مش انا ... لا لا اكيد مش انا اكيد هي تقصد واحد من العيال صحابي اللي بيلبسوا كل هدومهم عشان يتصوروا دول
قلت البونية جبرت بخاطري ياواد ادخل اجبر بخاطرها بكلمتين على البروفايل بتاعها وقولها نعيما ولا شفيتم ولا اي حاجه من الكلام النواعمي دا
اول ما دخلت لاقيت نص لكلامها كالتالي " الشباب اللي بيحطوا صور وحشة بليز بلاش لاني بنت محترمة ومابحبش الحاجات دي "
قلت يا سلام هي دي اخلاق بنات مصر يا جدعان هي دي البنات اللي على حق اللي بتقول للغلط لاء
قلت اتفرج على صورها
اول صورة صورة البروفايل واللي وصلتني والله قمر
تاني صورة قمر بردو بس مخفف هدومه شوية ... حر بقى انتوا عارفين الصيف السنه دي
تالت صورة شكل الحر زاد
رابع صورة لا دا مصيف بقى
المهم مع وصولي لخامس صورة كان ناقص بس حاجتين وتبقى الست دي كانها مراتي واكون شوفتها كما ولدتها الست امها الله يرحمها ويحسن اليها ونبعت لها رسالة شكر مكان ماهي قاعدة على الحاجات الطرية اللي خلفتها دي
اومال احترام ايه ومالكيش في الكلام الوحش ايه بقى هو الاحترام دا شعار بنتكلمه ولا ايه
الناس لما قالت ان الشرف مش في غشاء البكارة قلت مظبوط
لما واحده تعمل كل حاجه لحد قبل ما توصل لمرحلة النهاية وتقول استوب ... طب هو دا بردو يبقى شرف
لما واحده الدنيا كلها تتفرج على جسمها وميبقاش منه الا حته صغيره بتداريها ورقة التوت بدعوى ان الحته الصغيرة دي عيب ... طيب وهو اللي قبلها مش عيب ... هو دا يبقى شرف
ربما لا يكمن الشرف في غشاء البكارة ولكن كشف كل شيء دون غشاء البكارة لا يعد شرف أيضا ... لا دا من وجهة نظري المتخلفة كشف اي شيء مش شرف من اساسه
وأحلى من الشرف مافيش ( الله يرحمك يا توفيق يا دقن ) ـ
